Novruz Məmmədov bu gün demişdir ki, qanunvericiliyə edilmiş «dəyişikliklərə uyğun olaraq, 2017-ci ilin dekabrın 1-dən etibarən İ.Məmmədov məhkəməyə müraciəti əsasında cəza müddətinin 2/3 hissəsini çəkdiyinə görə şərti azadlığa buraxılma hüququna malik ola bilər. Bununla yanaşı, Azərbaycan tərəfi məsələnin digər həll yollarının axtarılması üçün konstruktiv danışıqlara gedə bilər».
Birincisi, doğrudan da dekabrın 1-dən edilmiş dəyişikliklərə əsasən ağır cinayət törətməyə görə təyin edilmiş cəza müddətinin ən azı üçdə iki hissəsini çəkən şəxslər cəzadan şərti olaraq vaxtından əvvəl azad oluna bilər. İlqar Məmmədov, ona heç bir əsas olmadan təyin olunmuş cəzanın üçdə iki hissəsi artıq çəkib. Ancaq o özü şəxsən bu barədə müraciət etmək niyyətində deyil – bunu başqa cür yozmaq istəyənlərə izah edirəm ki, İlqarın dörd il on ay həbsdə qalmasının səbəbkarı hökumətdir – bu fakt Avropa İnsan Hüquqları Məhkəməsinin qərarında (artıq iki qərarında) və Avropa Şurası Nazirlər Komitəsinin çoxsaylı qərar və qətnamələrində öz əksini tapıb. Buna görə də, məhz hakimiyyət bu məsələni çözməlidir.
Novruz Məmmədov onu da deyib ki, məsələnin digər həll yollarının axtarılması üçün konstruktiv danışıqlara getsə, daha yaxşı olar. Bildirirəm ki, biz belə danışıqlara hazırıq.
