Sabiq müstəntiqin cinayət işi Lənkəran Ağır Cinayətlər Məhkəməsinə göndərilib
Zərdab Rayon Prokurorluğunun keçmiş müstəntiqi Rüfət Səfərovun cinayət işi iyulun 12-də baxılmaq üçün Lənkəran Ağır Cinayətlər Məhkəməsinə göndərilib. Bu barədə ”Turan”IA-a məhkəmənin dəftərxanasından bildiriblər.
Məhkəmə prosesinə hakim Asim Hacıyev sədrlik edəcək. Məhkəmənin hazırlıq iclası iyulun 25-i saat 12:00-a təyin edilib.
R.Səfərov 2015-ci ilin sonlarında bəyanat verərək prokurorluq orqanlarından istefa verdiyini bəyan edib. Bundan sonra Baş Prokurorluq onun barəsində xidməti yoxlama aparıb.
Baş Prokurorluğun yaydığı məlumata əsasən Rüfət Səfərov “Prokurorluq haqqında” qanunun 34-cü və “Azərbaycan Respublikası Prokurorluğu işçilərinin etik davranış Kodeksi”nin 30 və 31-ci maddələrinin tələblərini kobud surətdə pozaraq prokurorluq orqanlarında prokuror və ya müstəntiq vəzifəsi ilə bir araya sığmayan hərəkətlərə yol verdiyinə görə prokurorluq orqanlarından xaric edilib. Onun barəsində baş prokuror yanında Korrupsiyaya Qarşı Mübarizə Baş İdarəsində Cinayət Məcəlləsinin 311.3.2-ci maddəsi (rüşvət alma-təkrar törədildikdə) ilə cinayət işi başlanıb.
Bakının Binəqədi Rayon Məhkəməsi 2016-cı il yanvarın 15-də Səfərovun barəsində 3 ay 26 gün müddətinə həbs-qətimkan tədbiri seçib. Yanvarın 22-də Binəqədi Rayon Məhkəməsi Səfərovun barəsində seçdiyi həbs-qətimkan tədbirini ev dustaqlığı ilə əvəz edib.
R. Səfərov iqtidarda olan Yeni Azərbaycan Partiyasının(YAP) fəallarından, Milli Məclisin keçmiş üzvü Eldar Sabiroğlunun oğludur. Eldar Sabiroğlu son bir ildə Prezident Administrasiyasının rəhbəri Ramiz Mehdiyevin fəaliyyətini tənqid etməklə yadda qalıb.
R.Səfərov ittihamı sifariş kimi qiymətləndirir. Cinayət işinin ibtidai istintaqını baş prokuror yanında Korrupsiyaya Qarşı Mübarizə Baş İdarəsi aparıb.
