Çempionlar Liqasında III təsnifat mərhələsinin oyunları davam edir.
xebername.info-nun məlumatına görə, ölkəmizi qitənin ən nüfuzlu klub turnirində təmsil edən “Qarabağ” bu gün Çempionlar Liqasında III təsnifat mərhələsində “Seltik”-lə cavab oyununa çıxacaq.
Qurban Qurbanovun komandası doğma meydanda Şotlandiya çempionu “Seltik”i qəbul edəcək.
Tarixində ikinci dəfə Çempionlar Liqasında iştirak edən Ağdam təmsilçisi ilk oyunda səfərdə oyunun 82-ci dəqiqəsində qapısında gördüyü qolla 1:0 məğlub olmuşdu. “Köhlən atlar” doğma divarlar arasında mərhələ adlayarsa, ölkə futbolu tarixində Çempionlar Liqasının pley-off mərhələsinə vəsiqə qazanan ilk klub olacaq. Digər yandan növbəti mərhələyə adlamaqla, ölkə çempionu ən azından Avropa Liqasını qarantiləmiş olacaq.
Qarşılaşma Tofiq Bəhramov adına Respublika stadionunda Bakı vaxtı ilə saat 21:30-da başlayacaq.
Çempionlar Liqası, III təsnifat mərhələsinin cavab oyunu
05.08.2015 21:30. “Qarabağ” (Azərbaycan) – “Seltik” (Şotlandiya)
Baş hakim: Martin Strömbergsson (İsveç)
Tofiq Bəhramov adına Respublika stadionu
Elnur ORUCLU
