Elgiz Qəhrəman başına gələnləri vəkilinə danışıb

Avqustun 19-da vəkil Nemət Kərimli 1 saylı Bakı İstintaq Təcridxanasında həbs olunan nidaçı Elgiz Qəhrəmanla görüşüb. Elgiz Qəhrəman başına gələnlərlə bağlı vəkilinə danışıbş Bir neçə gün idi həbs olunan fəalla nə ailəsinin, nə də vəkilinin görüşünə imkan verilmirdi. 

Nemət Kərimli hazırda Elgiz Qəhrəmanlının özünü normal hiss etdiyini, amma 1 saylı Bakı İstintaq Təcridxanasına köçürülənədək fiziki və psixoloji təzyiqlərə məruz qaldığını bildirib: 

“Elgiz Qəhrəmanlı dedi ki, “Bandotdel”də olduğu müddətdə ona işgəncələr verilib, zorla boynuna cinayət məsuliyyəti qoymaq istəyiblər. Həmin idarədə həbs olunan gün (12 avqust) qolları qandallanıb və Şahlar adında əməliyyatçı cibinə narkotik atıb. Sonra otağa hal şahidləri çağırıb cibimdən narkotiki çıxardılar”.

Elgiz Qəhrəmanlı vəkili ilə görüşdə başına gələnlərin hamısını danışıb. Nemət Kərimli görüşdən sonra deyib ki, müdafiə etdiyi şəxs həbsin birinci günü narkotik ittihamını qəbul etmədiyi üçün BMCMİ-də əməliyyatçılar tərəfindən ağır formada döyülüb. Avqustun 13-də Nərimanov Rayon Məhkəməsində Elgiz Qəhrəman haqqında 4 aylıq həbs-qətimkan tədbiri seçilib, məhkəmədə siyasi məhbus bütün ittihamları rədd edib. Bundan sonra yenidən “Bandotdel”də gənc fəalı döyüblər. (ardı aşağıda)

“Bundan sonra avqustun 15-də Baş Mütəşəkkil Cinayətkarlıqla Mübarizə İdarəsində şöbə rəisi olan Kərim adında polis gənc fəalı otağına çağırtdırıb. Şöbə rəisi Elgiz Qəhrəmanı sorğu-sual edib, “hansı məqsədlə Türkiyədə təhsil almısan?”, “Fətullah Gülənlə hansı əlaqələrin var?”, “Etiraf elə, sən də o şəbəkənin içindəsən” və s. kimi suallar verib, ittihamlar irəli sürüb”, – deyə vəkil bildirib.

Elgiz Qəhrəmanlı vəkilinə bildirib ki, o ittihamları rədd edəndən sonra şöbə rəisi Kərim onu dubinka ilə ağır formada döyməyə başlayıb. Əməliyyatçılar Elgiz Qəhrəmanı saxlayıb, Kərim adlı rəis isə nidaçının başına və bədənə dubinka ilə zərbələr vurub. Ağır işgəncələr verəndən sonra polislər gənc fəala Gülən şəbəkəsi ilə bağlı saxta izahatı imzatdırıblar.

“Gənc fəal sonuncu dəfə isə 18 avqustda Apellyasiya Məhkəməsində proses ərəfəsində döyülüb. Elgiz Qəhrəmana məhkəməyə məktub yazmağı təklif ediblər, o da imtina edib. Bundan sonra əməliyyatçılar nidaçını döyməyə başlayıb. Bundan sonra zorla məhkəməyə gəlməkdən və apellyasiya şikayətindən imtina üçün məktub yazdırıblar”, – deyə vəkil bildirib

Qeyd edək ki, Elgiz Qəhrəman narkotik vasitələri, psixotrop maddələri, onların prekursorlarını hazırlama, istehsal etmə, əldə etmə, saxlama, daşıma, göndərmə və ya satmada ittiham olunur. Bu ittihamla gənc fəal əmlakı müsadirə olunmaqla 5 ildən 12 ilədək müddətə azadlıqdan məhrum etmə ilə cəzalandırıla bilər.

NİDA Vətəndaş Hərəkatı Elgiz Qəhrəmana qarşı ittihamların əsassız olması, onun siyasi mövqeyinə görə həbs edilməsi barədə bəyanat yayıb.