Gənc fəal, rok musiqi ifaçısı Camal Əlinin qohumları Bakı Şəhər Baş Polis İdarəsinə aparılıb.Bu barədə Camal Əli özü məlumat verib. Bildirib ki, buna səbəb sonuncu çəkdikləri “Heykəl Baba” adlı repdir:
“Anamı Bakı Şəhər Baş Polis idarəsinə aparıblar. Hal-hazırda ordadır. O biri qohumları da gətirəcəklərini deyiblər. Əvvəlcə dünən gəlib aparıblar Sabunçu Rayon Polis İdarəsinə. Deyiblər ki, oğlunuz mahnı yazıb, onu tuta bilmirik, sizi tuturuq. Şifahi xəbərdarlıq ediblər. Deyiblər ki, silsin “Youtube”dan. Bu gün yenə gəliblər və bu dəfə artıq Bakı Şəhər Baş Polis idarəsinə aparıblar”.
Camal Əli heç nəyi silmək fikrinin olmadığını söyləyir: “İlham Əliyev istefa verərsə, mən də həmin videonu silərəm. Haqq-ədalət yerini tapana qədər fəaliyyətimə davam edəcəyəm”.
Camal Əlinin sonuncu “Heykəl Baba” adlı ifası ilə ölkə rəhbərliyini gənc fəallara qarşı söz və ifadə azadlığının pozulması ilə müşayiət edilən təqiblərə son qoymağa çağırır. Videoya “Youtube”da 11 minə yaxın baxış olub.
Camal Əli 2007-ci ildə H.O.S.T qrupunda repçi kimi çalışıb. 2008-ci ildə qrupu tərk edib. 2012-ci il martın 17-də Bakıda hakimiyyət əleyhinə olan mitinqdə iştirak edərkən, polis tərəfindən həbs olunub. Azadlığa buraxıldıqdan sonra Azərbaycanı tərk edib. Hal-hazırda Berlində yaşayır.
