Noyabrın 20-də Vəkillər Kollegiyasından kənarlaşdırılan Yalçın İmanov hesab edir ki, cəzalandırılmasının gerçək səbəbi Nardaran olayları ilə bağlı həqiqətləri ictimaiyyətə çatdırmasıdır. «Həyatımın müəyyən mərhələsi başa çatır, yeni bir mərhələ başlayır. Bu mərhələ haqda düşünmək lazımdır. Sadəcə, müəyyən narahatlığım var. Bu da ondan ibarətdir ki, həbsdə olan dostlarla sağollaşa bilmədim. Onlar mənim üçün təkcə müvəkkil, müştəri deyil, həm də dostlardır. Biz onların müdafiəsi ilə bağlı mümkün olanı, əlimizdən gələni etmişdik. Sağollaşa bilməsək də, əminəm ki, onlarla azadlıqda görüşəcəyik. Bir, iki, üç, beş il sonra olsa belə…».
