Sentyabrın 19-u İçəri Şəhərdə, Qoşa Qala Qapısında “Avropa şəhərciyi 2015” tədbiri keçiriləcək. Avropa İttifaqının Azərbaycandakı Nümayəndəliyi və Avropa İttifaqının üzv ölkələrinin səfirlikləri tərəfindən təşkil olunan tədbirin məqsədi Bakı sakinlərini Avropa ölkələrinin milli adət-ənənələri, mədəniyyəti ilə daha yaxından tanış etməkdir.Saat 11:00-dan 20:00-dək davam edəcək təbdirin proqramına əyləncəli şoular, müxtəlif müsabiqələr, viktorinalar, karaoke, konsertlər və muzey turları daxildir. “Avropa şəhərciyi 2015”in konsert hissəsinin əsas qonağı isə Şotlandiyanın Peatbog Faeries qrupudur.
Avropa İttifaqının Azərbaycandakı səfiri Malena Mard tədbir haqqında fikirlərini belə ifadə edir: “Avropa şəhərciyi Aİ-yə üzv ölkələrlə birgə əməkdaşlıq çərçivəsində təşkil olunub. Məqsəd Avropa İttifaqını müxtəlif ənənələrimiz və mədəniyyətimiz vasitəsilə tanıtmaqdır. Mən hər kəsi əyləncə dolu gündə bizə qoşulmağa dəvət edirəm. Ümid edirik ki, 19 sentyabr həm böyüklər, həm də uşaqlar üçün maraqlı və yaddaqalan olacaq. İnanırıq ki, sizdə Avropa şəhərciyindən başlamaqla Avropa ölkələri haqqında daha çox öyrənmək marağı oyadacayıq.”
Qeyd edək ki, bu tədbir Azərbaycanda artıq 3-cü ildir ki, təşkil olunur. Tədbirə arzu edən hər kəs qoşula bilər, giriş sərbəst olacaq.
Elnur ORUCLU
