ATƏT-in Bakı ofisi ilə bağlı başlayan siyasi qalmaqal davam etməkdədir. Hakimiyyətin prosesləri tam fərqli rakursdan təqdim etməyə çalışmasına rəğmən ABŞ-ın ATƏT-dəki səfiri Daniel Baerin söylədikləri məsələlərə aydınlıq gətirdi. ABŞ-ın ATƏT-in Daimi Şurasındakı səfiri Daniel B.Baer iyunun 8-də Vyanada qurumun iclasında çıxış edərkən bəyan edib ki, baş verənlər çox məyusedicidir, bunu başqa cür ifadə etmək mümkün deyil.
Səfirin sözlərinə görə, Azərbaycan ötən cümə günü Layihə Koordinatorunun işilə bağlı Anlaşma Memorandumundan imzasını geri götürmək barədə xəbərdarlıq edib. Səfir vurğulayıb ki, Layihə Koordinatoru 57 üzv dövlətin razılaşdığı siyasi mandatla fəaliyyət göstərib və onu yalnız konsensus qərarla ləğv etmək olar. Mandat bu ilin sonunda başa çatır. Səfir deyib ki, ofis fəaliyyətini davam etdirməlidir. “Biz Azərbaycan hökumətini Anlaşma Memorandumundan imzasını geri götürmək qərarına yenidən baxmağa çağırırıq. Yeni Anlaşma Memorandumu olacaqsa, bu, tezliklə həyata keçirilməlidir və yeni memorandum indikinin bütün qüsurlarını həll etməlidir, Layihə Koordinatorunun fəaliyyət qabiliyyəti gücləndirilməlidir”, deyə səfir vurğulayıb.
