29 yaşı olan Argentina milli komandası və Barcelona futbol klubunun hücumçusu Lionel Messi uğursuz penalti zərbəsindən sonra beynəlxalq futbolla vidalaşıb.“Bu mənlik deyil. Mənim üçün milli komanda bitdi. Mən bacardığımı elədim, çempion olmamaq adama pis təsir edir,” futbolçu Copa America turnirinin finalında Çiliyə məğlub olduqdan sonra bildirib.
Barcelona-da isə Messi səkkiz dəfə La Liga-nın, dörd dəfə isə Çempionlar Liqasının qalibi olub.
Lakin milli komandada o yalnız 2008-ci Olimpiya qızılına sahibdir.
Argentina 2014-cü il Dünya Çempionatının finalında Almaniyaya 1-0 məğlub olmuşdu. Messi, həmçinin, 2007-ci ildə keçirilmiş Copa America turnirinin finalında Braziliyaya məğlub olub.
“Mən artıq dörd finaldır ki, çalışıram. Bu mənim ən çox istədiyim şey idi, lakin əldə edə bilmədim, məncə artıq hər şey bitdi,” o əlavə edib.
Messi turnirdə beş dəfə fərqlənib. Yarım-finalda ABŞ-a cərimə zərbəsindən vurduğu qol onu 55 qolla ölkəsinin rekord qolçusu edib.
