Müdafiə Nazirliyi əsgərlərin hansı şəraitdə yaralanmasına aydınlıq gətirmir
“Hazırda Papanindəki Hərbi hospitaldadır. Biz də burdayıq. Çarəsizik. Bilmirik dərdimizi kimə deyək. Həkimlər deyir, yaşamasına ümid yoxdur. Başından gülləylə atəş açıblar, vəziyyəti ağırdır. Tək deyil, onunla birlikdə əsgər yoldaşını da gətiriblər. Onu da sinəsindən gülləylə yaralayıblar. İkisi də reanimasiyadadır”.
Bunu AzadlıqRadiosuna hazırda Mərkəzi Hərbi Klinik Hospitalın reanimasiya şöbəsində komada olan əsgər Nahid Soltanovun qardaşı Elçin Soltanov deyib.
Bildirib ki, qardaşı Nahid Soltanov 13 aydır Ağdamdakı N saylı hərbi hissədə qulluq edir. İyulun 14-də, axşam saatlarında ailəyə onun yaralanması barədə məlumat verilib:
“Çıxarıblar Sarıcalı hospitalına, iki dəfə əməliyyat ediblər, ordan da gətiriblər Papanindəki Mərkəzi hospitala. Qardaşımın da, onunla birlikdə yaralanan digər əsgərin də vəziyyəti ağırdır. Həkimlər deyir, “bizdə bu əsgərlərin əməliyyatı üçün normal aparatlar yoxdur”. Qardaşım idmanla məşğul olurdu, boksçu idi, həkim deyir, “əslində ürəyi sağlamdır deyə ölməyib, yoxsa çoxdan ölərdi. Başın sağ yarımkürəsi yerində yoxdur. Həkim deyir, gedin, əliniz göydə olsun, yaralıya Allahdan ömür istəyin. Biz əlimizdən gələni etmişik, ancaq yaşamasına güman azdır”.
Əsgərin ailə üzvləri Müdafiə Nazirliyindən şikayətçidir. Deyirlər 2 əsgər ölümcül vəziyyətdədir. Ancaq biri çıxıb bu iki əsgərin ailəsinə bir kəlmə demir ki, hadisə hansı səbəbdən olub:
“Biz hələ də bilmirik ki, nə baş verib… Bu uşaqları kim vurub, niyə vurub, məqsəd, məram nə olub? – hamı susur. Hərbi hissə komandiri susur, bölük komandiri susur, Müdafiə Nazirliyi susur. Kim məsuliyyətə cəlb olunub? Hansı maddəylə? Ümumiyyətlə, cinayət işi açılıbmı? O qədər sualımız var, cavab verən tapılmır. Hələ də bilmirik, atəşkəs pozulub, yoxsa əsgərlər öz aralarında törədiblər bu hadisəni… Heç nə bilmirik”.
Nahid Soltanov ötən il Hacıqabul rayonundan hərbi xidmətə çağrılıb. Hərbi hissədə manqa komandiri olub. Ailə üzvləri deyirlər ki, xidmətdə fərqlənməyə görə Fəxri Fərmanla da təltif olunub.
Olayla bağlı hələlik, Müdafiə Nazirliyindən münasibət öyrənmək mümkün olmayıb.
