Baş nazirin müavini Əli Əhmədov isə ərzaq mallarının qiymətlərində narahatlıq doğuracaq artımın olmadığını deyib. O, Bakının bəzi ticarət mərkəzlərində aparılan reyd zamanı jurnalistlərə bildirib ki, prezidentin həyata keçirdiyi sosial siyasətin ən mühüm məqamlarından biri insanların zəruri tələbatlarının və ehtiyaclarının ödənilməsi üçün bütün zəruri addımların atılmasıdır:
“Görülən işlər arasında əhalinin keyfiyyətli və münasib qiymətə ərzaq məhsulları ilə təmin edilməsi ən əsas yerdədir. Hökumətin apardığı siyasətlə ərzaq məhsullarının qiymətinin süni surətdə artırılmasının qarşısı alınır. Bu gün ticarət mağazasında qarşılaşdığımız vəziyyət, bizə verilən məlumatlar da bunu təsdiqləyir. Ticarət-satış mərkəzlərində qiymətlərin xüsusi hiss olunan və narahatlıq yarada biləcək dərəcədə artımı müşahidə olunmur”.
Ə.Əhmədov bildirib ki, Azərbaycanda istehlak malları, xüsusilə də ərzaq məhsulları içərisində daxili istehsal üstünlük təşkil edir: “Azərbaycanın ərzaq istehlakı bazarında idxaldan asılılıq əhəmiyyətli dərəcədə azalıb. Əhalinin ərzaq məhsullarına olan ehtiyacının böyük hissəsi daxili istehsal hesabına ödənilir. Yəni, qiymətlərin artırılması üçün obyektiv əsaslar yoxdur. Manatın dollara nisbətdə məzənnəsi ilə məlum olan dəyişikliklər, əgər istehsal daxildə həyata keçirilirsə, ərzaq məhsullarının qiymətlərinə elə də ciddi təsir etməyəcək”.
Kənd təsərrüfatı üzrə ekspert Vahid Məhərrəmov isə həmişə açıqlamalarında Azərbaycan iqtisadiyyatının idxaldan tam asılı olduğunu söyləyir.
